英倫法律隨筆

每次足球大賽(1) 有小國打出好成績，就有一班四年/兩年一度球球證衝出嚟話香港隊要點樣點樣學習。

今屆跑出一隊佛德國，三場分組賽，先打和西班牙，當你以為佢地淨係識「泊大巴」死守，佢地有本事入兩球迫和南美傳統勁旅烏拉圭，再同沙地賽和，保持不敗踢入32強。

去到淘汰賽你以為佢地目標已達，點知佢地有本事嚇到阿根廷癩屎，上半場先落後下居然有力入返一球迫和對手，去到加時一開始就俾阿根廷入波，你以為佢地都散，點知佢地轉頭就入返球世界波追平，阿根廷去到臨完場先再入一球以3:2進級，老套一句，佛德角都算雖敗尤榮。

咁你話香港點樣向佛德角學習，就唔係要學咩打不死精神呢堆屁話，亦唔係叫Jayden媽俾個仔唔駛做完homework先去踢football，其實真係要由法律著手。

觀乎佛德角今屆世界杯嘅球員名單，二十六人大軍中有十五喺海外出身。佛德角喺上世紀缺乏天然資源，年青人缺乏機會，而該國喺1975年先脫離葡萄牙獨立，好多人都好似澳門人咁有歐盟護照，好自然年青一代就係去歐洲搵機會。而部分佛僑就喺歐洲結婚生子，建立家庭。呢班佛國子弟有機會接受歐洲高水平嘅足球訓練，有機會成為職業球員，那怕只係歐洲嘅二三線聯賽，喺非洲區都有力成為賭仔口中每一屆非國杯「讓波開下盤、受讓開下盤」嘅奇兵。

重點係呢班僑民子弟，按佛國國籍法只要係父母或者祖父母是但有一個係佛國人都可以取得佛國籍。加上佛國近年經濟喺旅遊業帶動下改善，令國家有資源去搞子弟兵，而呢班喺歐洲踢二三線球會嘅僑民子弟都喜獲呢個踏上國際賽舞台嘅機會。

相反，按國際足協規定，要係香港永居性居民兼持有中國國籍(簡單來說，即係持有特區護照)，先可以代表香港隊。按《中國國籍法》，如果小朋友喺外國出世、父或母已定居海外， 則未能繼承中國籍，而同時都唔會繼承到父母嘅香港永久性居民資格。

所以如果幻想香港呢一波移民潮下有一班Jayden喺外國踢波就會為香港帶來佛德角模式，喺國籍法上係唔可行。之不過呢，到抵父母憑一本機場過保安都唔承認嘅BNO護照取得嘅外國籍算唔算定居呢，係要拭目以待。如果唔承認拎MPF、唔承認過保安、但承認繼承國籍以代表港隊，又會唔會好似馬來西亞足協咁俾人停賽呢，就要等呢班Jaydens長大後先知道了。

(1) 歐洲國家杯或者世界杯，唔好鳩拗，真係未見過有香港人(賭徒例外)會注意非國杯。唔係佛德角2013年非國杯打入八強已經有呢個討論啦。

====================================================================

本文所提供的資料僅供一般參考用途，並不構成法律意見。作者已盡力確保內容準確及最新，但相關法律及規例可能會因時間及司法管轄區不同而有所變更。讀者不應僅根據本文內容而作出或停止任何行動，應向具資格的律師或其他專業人士尋求法律意見。作者及出版者對因依據本文內容而引致的任何損失或損害，概不負責。