過去的周末，筆者有幸在英國香港電影節中欣賞到翁子光導演的《金多寶》。雖說在中秋追月後一個星期才看賀歲片，但疫情間也有《飯戲攻心》，所以都早有經驗。

說起金多寶，倒有兩個移英港人就金多寶嘅FAQ，可以喺呢個英國法律專頁分享下。

第一件就係，中咗洗唔洗交稅?

雖說英國嘅稅務制度比香港複雜得多，但原則上，普通法原則係做生意、返工或者投資(Trade, professional or investment)收益先要繳交入息稅。1925年曾有安例裁定賭博嬴返嚟嘅彩金並不是一個人嘅入息，而香港嘅上訴法院亦喺2011年曾經跟隨呢個原則判炒股票輸咗錢係冇得扣稅。

當然稅務法例繁多，一般普通法原則都冇乜意義，英國政府亦曾經有稅例係嬴錢要交稅，但好快就發現捉蟲，因為要交稅就即係可以扣稅，而the house always win，賭仔扣稅一定多過交稅，咁就改為向賭場埋手收博彩稅好過。

咁當然，如果你嬴咗錢，拎住彩金擺喺銀行收息，要交稅; 買樓收租要交入息稅; 買股票收息要交股息稅; 炒賣股票、樓宇就要交資產生殖稅;乜都唔做拎去買野就要交VAT; 到死都洗唔哂就要交遺產稅。所以你呢刻唔駛交，遲早都係要交。

第二件，如果我叫老母叫阿哥幫我喺香港買，買咗唔分返俾我，點算? 我點可以保障自己

呢個都係FAQ。賀歲片《金多寶》中有舅公、現實中上個月又有食環督察(唔知點解食環就唔係休班督察呢? 難道喺辦公時間買?)中咗冇分返俾同事。

簡單答，就係完全唔明做乜要同人夾份買? 呢D野中就中, 唔中你買四十個字都係唔會中架啦。同埋，移咗民就買Euro Million啦，獎金豐富咁多。

不過你係都要買嘅，就冇得保障架啦。第一, 你點證明條飛你有份? 當你證明到， 有冇聽過，財到光棍手，一去冇回頭，人哋拎住幾千萬，咪慢慢同你打官司。

報警有冇用? 你話呢? 有冇聽過差人話「呢啲係民事」。你真係覺得咁簡單直接，隻食環狗落左叉廚未?

係架，你以為筆者想喺呢part同你講法律，講信托法(梗係唔係合同法啦，那來consideration?) 、講民事詐騙。其實，最簡單就係，中彩嘅嘢，命裏有時終須有，命裏無事莫強求。都係咪同人夾啦。

====================================================================

本文所提供的資料僅供一般參考用途，並不構成法律意見。作者已盡力確保內容準確及最新，但相關法律及規例可能會因時間及司法管轄區不同而有所變更。讀者不應僅根據本文內容而作出或停止任何行動，應向具資格的律師或其他專業人士尋求法律意見。作者及出版者對因依據本文內容而引致的任何損失或損害，概不負責。