最近黨媒同網上鋪天蓋地出文，吹到話喺英國「捱」完五年、拎到 Settlement（即係大家叫開嘅「永居」）就以為可以返香港「回流」享受由治及興嘅榮華富貴。馮睎乾都形容呢陣風係一波「潮文」。

咁筆者身邊就真係未見到有人一夠五年就回流，要回嗰D就一早回咗。不過可能呢個係同溫層，唔排除真係有人諗住一拎到「永居」就閃。不過如果你返去香港度真永居，隨時會犯下致命法律錯誤，辛苦幾年換返嚟嘅身份分分鐘化為烏有。

中文將 Settlement 譯做「永居」，嚴格嚟講係錯。英文本字根本完全冇「永久」嘅意思，譯做「定居」準確好多。

喺英國移民法入面，定居嘅法律本質只係一種無期限嘅「逗留許可」（Indefinite Leave to Remain）。請注意關鍵字：佢只係一種 Leave（許可），而唔係不可剝奪嘅身份。

按英國移民法規，只要你連續兩年內完全沒有喺英國出現過，你嘅 Settlement 就會自動失效（Lapse）。過期後想恢復資格，要重新申請Returning Resident Visa，有拒簽風險，千萬唔好以為可以鍾意買張機票就飛返嚟「續期」。

此外，因為定居只係逗留許可嘅一種，如果涉及嚴重犯罪等原因，內政部係有權依法直接撤銷定居資格，並將你遞解出境。

相反，入籍後要撤銷國籍嘅門檻係相當高，甚少會出現，唔會因為你太耐唔返嚟就撤消(例如你見好多英國退休人士選擇去西班牙長居)。一般而言只會喺申請國籍本身有欺騙情況、或者去到國家安全層面先會出現。而且英國係1961年聯合國減少無國籍公約成員，喺唔確定你有其他國籍下係唔會撤銷國籍。

拎到定居就急急腳回流，定係拎埋本 Passport 先？大家一定要小心規劃，千祈唔好輕信「回流潮文」，拿自己嘅後路嚟賭。

====================================================================

本文所提供的資料僅供一般參考用途，並不構成法律意見。作者已盡力確保內容準確及最新，但相關法律及規例可能會因時間及司法管轄區不同而有所變更。讀者不應僅根據本文內容而作出或停止任何行動，應向具資格的律師或其他專業人士尋求法律意見。作者及出版者對因依據本文內容而引致的任何損失或損害，概不負責。