英倫法律隨筆

最新一期的移民法規修改文件（Statement of Changes to the Immigration Rules: HC 584）正式公。喺云云修訂中，對香港BN(O)簽證有關的只有一項。就係修訂 Appendix Hong Kong BN(O) 内的 Rule HK62.1。

新嘅修訂下，喺申請永居時未滿十八歲嘅申請人，無需再符合在英連續居住五年呢一項條件。

然後好多人話睇唔明上面呢句點解，似乎大家來英太耐中文有退步，所以上面全條cap俾大家睇。

簡單嚟講，這是一項好消息！以前好多因為各種原因「未住夠5年」嘅未成年子女，因為種種原因爭幾個月原本需要被迫多續一次簽證、交多幾千鎊 IHS 同簽證費用才可以儲夠五年申請永居；今次修訂終於解開咗呢個長期困擾唔少香港人家庭嘅死結！

點解有啲細路搞到要續期？

以往按照舊例，任何人根據 BNO計劃申請永居，基本上都必須嚴格滿足在英國連續居住滿 5 年嘅要求。

然而，在現實運作中，有嘅細路嘅簽證生效日遲過父母，但到期日同父母一樣。最常見就係英國出世嘅嬰兒，佢哋嘅簽證到期日係父母同一樣。變相佢哋就喺簽證再期時都唔夠五年。另外，喺BNO 簽證開辦初期，因為內政部行政失誤，部分子女的申請批得慢，導致簽證生效日期比父母遲咗幾星期甚至幾個月，但 Home Office 給予的簽證到期日就跟咗父母，以至簽證期本身就唔夠五年。

此外，筆者亦接觸過有啲家庭因為想小朋友喺香港完成埋嗰個學年，或者父母想先嚟英國「開路」安頓好住屋同工作，過咗半年、一年甚至兩年先接小朋友過嚟。結果父母住滿 5 年申請 ILR 時，小朋友喺英國只係住咗 3-4 年，唔合符 5 年居住期，必須為子女單獨續期。

喺新例下，只要未成年子女與父母一同申請永居，且父母符合申請永居的資格，該未成年子女即使未在英國住滿 5 年，只要佢符合其他永居要求，亦可直接獲批永居！

新例會喺2026 年 10 月 8 日起正式生效。

若大家對子女嘅永居時間線或條文有疑問，建議喺遞交申請前仔細核對條文細節或諮詢專業法律意見！

====================================================================

本文所提供的資料僅供一般參考用途，並不構成法律意見。作者已盡力確保內容準確及最新，但相關法律及規例可能會因時間及司法管轄區不同而有所變更。讀者不應僅根據本文內容而作出或停止任何行動，應向具資格的律師或其他專業人士尋求法律意見。作者及出版者對因依據本文內容而引致的任何損失或損害，概不負責。